حساب كمية الطعام المناسبة في العزومات

 

كيف تحسبين كمية الطعام علي حسب عدد الأفراد ؟

تحديد كمية الطعام في العزومة مهم جدا حتي تكون الكمية ليست قليلة و في نفس الوقت لا يتبقي منها كميات كبيرة بعد أنتهاء اليوم

من أية كيوان موضوع مميز لكميات الطعام من كل صنف الكافية للفرد

 رمضان كريم وبيحلا فيه لمة الاهل والاصحاب طبعا لو معزومين برا مفيش مشكلة قد ما بيكون عندنا عزومة بنعمل ليها الف حساب والنهاردة هنتكلم عن شوية نصايح نخلى عزومتك زى ما بتمنى واكتر

اول حاجة هنتكلم عنها هى عزومة الاهل لانها بتكون اسهل شوية من عزومة اصدقاء او زملاء عمل يمكن لاننا فى عزومة الاهل بنكون عارفين ذوق المعزومين فى الاكل أيه

ونقدر كمان نتشاور معاهم فى الاصناف اللى هنعملها

نيجى بقى ل حساب كمية الطعام المناسبة في العزومات وده بيكون صعب شوية للمبتدئين انهم يحددو الكميات المناسبة

هنقول مثلا للارز نعمل نصف كوب ارز مصرى لكل فرد ولو بسمتى بيكون تلت كوب مناسب جدا

الصوانى زى الرقاق والكرونة بالبشاميل والجلاش تقريبا الصينية بتكفى 8 افراد   وده طبعا عشان بتكون فى اصناف جانية

البانية والبفتيك والبيكاتا تقريبا الكيلو مناسب جدا من6 ل8 افراد

السلطات مهمة جدا تكون اكتر من صنف يعنى على الاقل نوعين سلطة والشوربة نوع واحد او اتنين لو خايفة من تنوع الازواق

بالنسبة لتحديد كميات الطيور طبعا الفرخة زى البطة زى الوزة كلهم لاربع افراد فقط حتى لو عندك نوع لحوم تانى بس مينفعش تقطعى الطيور دى لاكتر من اربعة اما بالنسبة للحمام والسمان لو مفيش جنبهم نوع تانى يبقى 2 لكل فرد اما لو هتعملى معاهم نوع لحوم اضافى يبقى واحدة تكفى لكل فرد

اللحوم المطبوخة زى كباب الحلة لو قطع صغيرة يبقى الكيلو مناسب جدا لعدد 6 افراد

والكفتة المشوية على حسب حجمها لكن فى الغالب 3 اصابع كفتة لكل فرد كافى

السمبوسة والسبرينج رولز والقطائف الحادقة فى المتوسط تلات قطع لكل فرد

كده تقريبا عرفتى تقدرى كميات الاكل ولازم كمان تاخدى بالك من نقط مهمة جدا اولهم انك تحاولى توزعى الطبخ على الفرن والبوتجاز يعنى

ميكونش كل الاكل صوانى فى الفرن لانك مش هتلاقى وقت كافى للتسوية

نقطة كمان مهمة حاولى قدر الامكان تحضرى من قبل العزومة بيوم تجهيزات مبدئية وممكن كمان تحضرى العصائر وشربات الحلويات وتغسلى الخضار وكمان ممكن توضبى السفرة وتغطيى الاطباق بمفرش خفيف عشان الاتربة

اما بقى الحلويات ممكن تحشى القطايف من قبلها بيوم وتحطيها فى علبة محكمة فى التلاجة وتكون جاهزة على القلى كمان الكنافة والجلاش ممكن تحضريها وتغلفى الصوانى كويس وتخليها جاهزة ع التسوية

كل النصايح دى مناسبة جدا لعزومة الاصدقاء او الزملاء اللى اول مرة يتعزمو عندنا بس حاولى بطريقة لطيفة تعرفى منهم لو فى اصناف مش بيحبوها عشان تتجنبيها ومتكونيش تعبى ع الفاضى لان ده صيام وكل صنف مهم جدا أن الناس تدوق منه

اخر نصيحة واهم نصيحة حذارى من تجربة اى صنف جديد مهما كنتى شايفاه سهل وبسيط خليكى فى الاصناف اللى انتى مجرباها وواثقة من نتيجتها لان العزومات لاتتحمل الاحراج اللى ممكن أكلة تورطنا فيه

العزومات مرهقة أه لكن لما بنلاقى الناس مبسطوين وبنسمع منهم كلمة تسلم ايدك ده بينسينا اى تعب

وكل سنة وانتم بخير

أيه كيوان