الخلع أسلوب حياة

الخلع أسلوب حياة ..

الحقيقة بقالي فترة كبيرة اوي ما مسكتش القلم و كتبت ، بس في جملة استفزتني جدا، سمعتها اكثر من مرة و حسيت انها للاسف الشديد بقت منتشرة ،  بين رجالة بشنبات، الاسم رجالة و بس الا من رحمه ربي!!!
” ليه اطلق لما ممكن انخلع”” الجملة اللي بقت علي لسان كل رجل محترم مراته طلبت منه الطلاق …. الغريب ان الست بطبيعتها صعب تطلب الطلاق ، الا لو فعلا وصلت لمرحلة ان البعد عنه مكسب مش خسارة و ان سوء العشرة وصلت لاقصي احتمال ليها، وقت ما تقف و تقول I give up…. بتبقي فعلا استهلكت نفسيا و معنويا  ، و احيانا ماديا، و علي الاغلب بيبقي كل امانيها انها تطلع بالمعروف اللي هيا ما شفتهوش في الزيجة تقريبا … لكن للاسف، الرجل المصون ما يكتفيش بسوء العشرة و عدد السنين من احلي سنين عمرها اللي ضاعت في زواج فاشل، دة كمان عايز يضيع سنين تانيين في المحاكم علشان بس تحصل الزوجة علي حريتها…
و بقي مبدأ الرجل ادفع فلوس و انا بتجوزك و ادفع كمان و انا بطلقك… ليه بطبعهم ??? و استمر قهر و ذل المرأة سنين في محاكم الاسرة، بس علشان تحصل الزوجة علي حريتها…. حتي ظهر قانون الخلع اللي تقريبا بقي مش بس طوق نجاه للزوجة بالعكس دة بقي اسهل حل للرجل المحترم في سبيل انه مايدفعش و لا مليم… اول ما ظهر القانون، تخيلت الست انها اهانة كبيرة للرجل، لكن بعد سنيين من تطبيق هذا القانون، اكتشفت الست ان أحيانا الرجل مقاس كرامته اكس لارج  ، و قبل وهو كله ثقة بالنفس انه يبقي مخلوع مش مطلق… بعيدا بقي عن الالقاب اللي لا بتودي و لا بتجيب، احنا بنتكلم في نقطة مهمة جدا، الا و هي ان الزوجة ما بقاش قدامها غير طريقين ملهمش تالت :-
يا تعيش بقيت عمرها مع رجل مش قادرة تبص في خلقته و تتمني انها تبقي ارملة و ينزل السر الإلهي ، يا توصل انها تبيع الهدوم اللي عليها و تخلعه. و بعد ما تحصل علي حريتها بصعوبة و تقول الدنيا حتبقي وردي تلاقي ان القصة ما انتهتش…. ابسولوتلي دي لسة بتبتدي لانها بتدخل دايرة جديدة من اللف في المحاكم علشان نفقة الولاد ، و مسكن و مصاريف مدارس و معيشة و سنين تضيع ما بين محاميين و قواضي لاجل حقوق اولاده!!!
و يبقي السؤال هنا، هو الطلاق اللي ذكره ربنا في القران الكريم اللي بنصلي بيه و بنقراه، هل الرجالة سمعت عنه و لا بس الذبيبة اللي علي قورة كل رجل منهم و هو داخل المحكمة ينخلع بقت زي الشنب و السكسوكة اللي مربينها، مجرد حركات لجذب الانظار لرجولة مصطنعة بالكاد هي خارجية فقط لا غير

#الخلع_اسلوب_حياة