طريقة تدميس الفول فى حلة الضغط

فول مدمس بيتى

مافيش أحلى من فطار الفول وياسلام لو متدمس بيتى كمان ومضمون

طريقة تدميس الفول فى حلة الضغط بالبيت

المكونات

1 كيلو فول ناشف

1/2 كوب عدس

1/2 كوب رز

عصير 5 ليمونات

1 ملعقة كبيرة بابريكا

لنقع الفول نحتاج حوالى 3 ليتر ماء

للطبخ نحتاج من 5 ل 6 ليتر ماء

الطريقة

1) اغسلى الفول وانقعيه فى ماء يغطيه مدة ليلة كاملة

2) اغسلى الأرز مع العدس

3) نصفى الفول من ماء النقع ونحطه فى حلة الضغط (( حلة بريستو )) ونحط فوقه كمية الماء المذكورة والأرز والعدس والبابريكا ونقفل الحلة بإحكام ونحطها على نار عالية

4) بمجرد ما تخرج الحلة البخار وتبدأ بإصدار صفارة نهدى النار تحتها ونسيبها مدة ساعة وربع

5) نرفع الحلة عن النار ويترك لحد ما تهدى وبعدين نفتح الحلة , نحط علي الفول عصير الليمون ونقلبه .. الليمون هيحافظ على لون الفول الفاتح قدر الامكان .. نقسم كمية الفول لأكلات ونحفظها بالفريزر بعد ماتبرد خالص , ويفضل نسيبه متغطى لحد ما يبرد عشان لونه مايتغيرش

6) لو مافيش عندك حلة الضغط اتبعى نفس الخطوات السابقة فى الفوالة أو فى قدر عادى عميق وكبير وحطيه على النار لحد مايغلى وبعدين انقليه لأصغر شعلة وقللى النار قدر الإمكان ويفضل نحط تحت الفواله موزع حرارة (( شياطة )) , هاتاخد حوالى من 7 – 8 ساعات مع مراعاة تقليبه من وقت للتانى عشان مايلزقش

7) قدميه بالخلطة المفضلة عندك وبألف هنا وشفا