القلقاس بالسلق والكزبرة من أشهر أكلات الشتاء في البيت المصري، وطبق أساسي على سفرة عيد الغطاس. طعمه دافي ومشبع، ولو اتعمل صح بيطلع قوامه ناعم ومن غير أي لزوجة. في المقال ده هنعرف طريقة عمل القلقاس زي الأمهات بالظبط، مع كل النصايح اللي بتفرق في الطعم.
مقادير القلقاس بالسلق
- 1 كيلو قلقاس
- 1 حزمة سلق كبيرة
- 1 حزمة كزبرة خضراء
- 1 رأس ثوم مقشر
- 5 أكواب مرقة لحمة أو فراخ
- 2 معلقة كبيرة سمن
- ملح وفلفل أسود حسب الرغبة
- عصير ليمونة (اختياري)
طريقة تقشير القلقاس من غير ما إيدك تهرشك
القلقاس فيه مادة بتسبب هرش في الإيد، عشان كده البسي جوانتي وانتي بتقشريه. اغسليه وهو بقشره ونشفيه كويس قبل التقشير، لأن القلقاس المبلول بيبقى لزج وبيتزحلق. بعد التقشير قطعيه مكعبات متوسطة، وما تغسليهوش بعد التقطيع عشان ما يطلعش مادة لزجة.
طريقة عمل القلقاس بالسلق والكزبرة
- في حلة على النار سخّني المرقة، ولما تغلي ضيفي مكعبات القلقاس والملح والفلفل.
- سيبي القلقاس يستوي على نار متوسطة 20 لـ 25 دقيقة لحد ما يبقى طري.
- في الوقت ده اغسلي السلق والكزبرة كويس، وشيلي العروق الناشفة من السلق، وقطعيهم.
- افرمي السلق والكزبرة والثوم في الكبة أو الخلاط من غير مية لحد ما يبقوا خليط ناعم.
- في طاسة سخّني السمن، وضيفي خليط الخضرة وقلبيه 5 دقايق لحد ما ريحة الثوم تطلع ولونه يغمق شوية.
- ضيفي التقلية الخضرا على القلقاس وقلبي، وسيبيه على نار هادية 10 دقايق لحد ما الشوربة تتقل.
- لو حابة طعم منعش ضيفي عصير الليمون قبل ما تطفي النار.
طريقة تقديم القلقاس
القلقاس بيتقدم سخن مع الرز الأبيض بالشعرية، وجنبه لحمة أو فراخ مسلوقة من المرقة. وفيه ناس بتحب تهرس جزء من القلقاس عشان الشوربة تبقى أتقل.
نصائح عشان القلقاس يطلع ناجح
- اختاري قلقاس متوسط الحجم وتقيل في الإيد، وابعدي عن القلقاس اللي فيه نقط سودا أو طري.
- ما تقطعيش القلقاس صغير أوي عشان ما يتهريش.
- الليمون بيقلل اللزوجة وبيدي طعم حلو، بس ضيفيه في الآخر.
- لو مش بتحبي السلق ممكن تعمليه بالكزبرة بس، أو تعمليه بالصلصة.
طريقة تخزين القلقاس
القلقاس المطبوخ بيتحفظ في الثلاجة لحد 3 أيام. ولو عايزة تخزني القلقاس النيء للشتا كله، شوفي طريقة تقطيع وتفريز القلقاس عندنا على الموقع.
أسئلة شائعة
ليه القلقاس بيطلع لزج؟
غالبًا لأنه اتغسل بعد التقطيع، أو اتقلب كتير وهو بيستوي.
ينفع أعمل القلقاس من غير مرقة؟
ينفع تستخدمي مية ومكعب مرقة، بس المرقة الطبيعية بتدي طعم أحسن بكتير.