طريقة عمل فراخ محشية بالفريك

 

طريقة عمل فراخ محشية بالفريك

المكونات

1 فرخة وزن كيلو.

1/2 كوب فريك.

3/4 كوب كبد على قوانص مفطع مكعبات.

1 بصلة متوسطة مفرومة.

1 طماطم مقطعة مكعبات.

1/2 كوب كسبرة أو بقدونس أخضر مفروم.

1/2 كوب كرفس مفروم.

1 كوب عصير طماطم.

ملح + فلفل أسود + 1/2 ملعقة صغيرة بهار.

2 ملعقة كبيرة زيت زيتون أو زيت نباتى ذرة أو عباد شمس.

طريقة عمل فراخ محشية بالفريك :

1) ننضف الفريك كويس من الحصى ونغسله ، نسلقه 3/4 سلق بحيث يكون طرى.

2) ننضف الفرخة كويس ، ونتبلها بالملح والفلفل من جوة وبرة  ،وندهنها بشوية من عصير الطماطم من برة عشان تدي لون جميل عند التحمير.

3) نضع الزيت على النار ، و نضيف له البصل ، ونقلبه شوية لحد ما يبقى شفاف ، وبعدين نضيف له الكرفس  ، ونتبلهم بملح وفلفل وبهار.

4) نقلب الكرفس مع البصل والبهارات كويس لحد ما يدبل ، وبعدين نضيف الكبد والقوانص ونقلبهم لحد مايبقى لونهم بني فاتح ، بعد كدة نضيف عصير الطماطم مع مكعبات الطماطم ، ونقلبهم شوية وبعدين نضيف الكسبرة الخضرة المفرومة.

5) نضيف للخليط اللى فات كمية الفريك بعد ما نصفيه من ماء السلق ، ونقلبه معاها كويس ، ونسيبه على النار شوية حوالى 5 دقائق مع التقليب ، بعدين نرفعة من على النار.

6) نحشى الفرخة بخليط الفريك ،تقريبا هاتاخد نص الكمية فى الحشو.

7) نقفل أرجل الفرخة كويس بخيط ، ونضعها فى صنية ونغطيها بفويل ، وندخلها الفرن لحد ما تستوى هاتاخد حوالى ساعة .. بعد ما تستوى نشيل الفويل ونحطها تحت شواية الفرن لحد ماتتحمر و نخرجها.

8) أثناء ما الفرخة بتستوى فى الفرن , نضع باقى كمية خليط الفريك على النار، ونسيبه على نار هادية زى ما بنعمل مع الرز عشان يكمل سوى ، ونقلبه من وقت للتانى .

9) فى طبق التقديم نفرد كمية الفريك اللى استوى كقاعدة ، وبعدين نضع فوقه الفرخة المحشية ، ونزينها بالكسبرة الخضراء المفرومة ونقدمها.