طريقة عمل بيتيفور العيد

 

طريقة عمل بيتيفور العيد

 المكونات 

7 أكواب دقيق

1 ملعقة صغيرة بيكنج بودر

2 كوب سكر بودرة

3 أكواب زبدة أو سمن بلدى

3 بيضات

2 ملعقة كبيرة كاكاو ، ذرة ملح  ، فانيليا

للتجميل : مربى مشمش او برتقال ناعمة .. شوكولاتة بيضاء وشوكلاتة بنى مذابة فورماسية بنى وملون

طريقة العمل :

1) أول حاجة هاننخل الدقيق مع البيكنج بودر والملح

2) نضرب الزبدة كويس بالمضرب الكهربائى وبعدين نضيف السكر بالتدريج مع الاستمرار فى الخفق لحد مايبقى الخليط هش .. بعدها نضيف البيض والفانيليا ونضربهم لحد ما يختلطو كويس

3) نشيل معلقتين كبار من الخليط دة على جنب

4) نضيف خليط الدقيق لخليط الزبدة والسكر بالتدريج ونقلبه بالمعلقة كويس بس من غير دعك لحد ما تبقى العجينة ناعمة ومابتلزقش بإيدك (( ممكن مانستعملش كل مقدار الدقيق ))

5) نقسم العجينة نصين .. هانسيب نص بلونه الأبيض , للنص التانى بقى : أولا هانقلب الكاكاو فى المعلقتين اللى كنا سايبينهم على جنب من خليط الزبدة والسكر , وبعدين نضيفهم للنص التانى من العجين ونعجنها كويس

6) نشكل العجينة على هيئة وردات أو قلوب أو أى أشكال تانية مفضلة بقمع البيتى فور أو بماكينة تشكيل البيتى فور

7) نرص الوحدات فى صاجات الخبز ونسيب مسافة بين كل وحدة والتانية

8) نخبزها فى فرن متوسط الحرارة حوالى 180 درجة لحد ما تستوى

9) نسيب البيتى فور لحد مايبرد خالص .. بعد كدة نلزق كل اثنتين شبه بعض فى الشكل بالمربى

10) نغمس البيتى فور البنى اللون بالشوكولاتة البنية من الجنب بس وبعدين نغمسه بالفورماسيه البنى , والبيتيفور الأبيض اللون نغمسه بالشوكولاتة البيضاء وبعدين بالفورماسيه الملون

11) نسيبه على جنب لحد الشوكولاتة ما تمسك أو نحطه فى الثلاجة مدة 10 دقائق بس

12) نقدمه أو نخزنه فى علب مقفولة كويس وبألف هنا وشفا كل عام وأنتم بألف خير